ИИМ чет өлкөлүк жарандарга коомдук тартипти сактоо талаптарын түшүндүрдү
Чет өлкөлүк жарандар арасында мыйзам бузуулардын алдын алуу боюнча түшүндүрүү иштери жүргүзүлдү. Бул тууралуу Ички иштер министрлигинин басма сөз кызматы билдирди.
Маалыматка ылайык, иш-чаранын негизги максаты — өлкөдөгү коомдук-саясий туруктуулукту сактоо, улуттар аралык ынтымакты бекемдөө жана чет өлкөлүктөр менен жергиликтүү тургундардын ортосундагы мүмкүн болгон чыр-чатактардын алдын алуу.
Жолугушуулар учурунда чет өлкөлүк жарандарга Кыргызстандын миграциялык мыйзамдарынын талаптарын сактоо, коомдук тартипти бузбоо жана укук бузууларга жол бербөө боюнча маалыматтар берилди.
Ошондой эле милиция кызматкерлери акча которуу, ортомчулук кызматтар, жумушка орноштуруу жана мүлк сатып алуу жаатындагы мүмкүн болгон алдамчылык схемалары тууралуу эскертишти. Жарандарга шектүү сунуштардан алыс болуп, этият болуу сунушталды.
ИИМ өлкө аймагындагы бардык адамдарды, жарандыгына карабастан, Кыргызстандын мыйзамдарын сактоого жана мыйзамсыз аракеттерге кабылган учурда укук коргоо органдарына кайрылууга чакырды.
