Ошто тазалык кызматына 5 миң сомдон ашык карызы барларга соттук чара көрүлөт
Ош шаарынын мэри Жанарбек Акаев "Ош-Тазалык" муниципалдык ишканасынын жетекчиси Жылдызбек Көчкөновду кабыл алды. Бул тууралуу калаа мэриясынан билдиришти.
Жолугушууда шаардын санитардык абалы, таштанды чыгаруу кызматы жана абоненттик базаны кеңейтүү маселелери каралды.
Мэр учурда расмий катталган абоненттердин саны 387 миңден ашканын, бирок шаарда жашаган калктын реалдуу саны кыйла көп экенин белгилеп, сентябрдын аягына чейин абоненттердин санын 425 миңге жеткирүүнү тапшырды.
Мындан тышкары, көп кабаттуу үйлөрдөгү жашоочулардын санын тактоо иштери жүрүп жатканы жана үч айдан ашык төлөбөгөн, карызы 5 миң сомдон ашкан абоненттер боюнча соттук өндүрүү чаралары көрүлүп жатканы маалымдалды. Жыл соңуна чейин таштанды чыгаруу кызматы үчүн топтолгон карызды 5 млн сомго чейин кыскартуу көздөлүүдө.
