Ат-Башыда сел жүрүп, унаадагы жаран аман-эсен куткарылды
12-июлда саат 20:30 чамасында Ат-Башы районунда кыска мөөнөттө жааган нөшөрлүү жаандан улам сел жүрдү. Бул тууралуу Өзгөчө кырдаалдар министрлигинин Нарын облустук башкармалыгы билдирди.
Маалыматка ылайык, сел Баш-Кайыңды жана Ача-Кайыңды айылдарынын ортосундагы сайда катталган.
Сел суусуна агып кеткен унаадагы бир жаран куткаруучулар тарабынан аман-эсен чыгарылган. Ал эми турак жайларга зыян келтирилген эмес.
Ошондой эле Ат-Башы – Өзгөрүш унаа жолу эки тараптуу ачылып, унаалардын кыймылы толугу менен калыбына келтирилген.
Алдын ала маалымат боюнча, жолго жана көпүрөгө зыян келген эмес. Тиешелүү кызматтар тарабынан кырдаалга көзөмөл жүргүзүлүүдө.
