Баткенде уруксатсыз курулуп жаткан имараттын иши токтотулду
Мамлекеттик архитектура-курулуш көзөмөлдөө департаментинин Баткен региондук башкармалыгы жүргүзгөн текшерүүдө үч кабаттуу имараттын курулушунда мыйзам бузуулар катталды. Бул тууралуу Курулуш, архитектура жана турак жай-коммуналдык чарба министрлигинен билдиришти.
Маалыматка ылайык, объектте тиешелүү уруксат берүүчү документтерсиз курулуш иштери башталган. Ошондой эле имарат Бирдиктүү мамлекеттик курулуштар реестрине катталбастан курулуп жатканы аныкталган.
Аталган факт боюнча жаран И.С.Иге карата укук бузуу жөнүндө протокол түзүлүп, 10 миң сом өлчөмүндө административдик айып пул салынды.
Мындан тышкары, мыйзам бузуулар толук жоюлганга чейин имараттын курулуш иштери убактылуу токтотулду.
