Караколдун эки аймагындагы жапайы кара куурайлар жок кылынды
Каракол шаарында жапайы кара куурайларды аныктоо жана жок кылуу боюнча кезектеги иш-чара Челпек аймагындагы тоо этектеринде жана Пристань конушунда уюштурулду. Бул тууралуу калаа мэриясынын басма сөз кызматы билдирди.
Челпек аймагындагы тоо этектеринде болжол менен 25 сотых жерге жыш өскөн кара куурайлар аныкталган. Өсүмдүктөрдү аймактык милиция бөлүмүнүн кызматкерлери, мэриянын өкүлдөрү жана жергиликтүү активисттер өрттөө жолу менен жок кылышты.
Мындан тышкары, Пристань аймагындагы жол жээктеринде болжол менен 10 сотых аянтты ээлеген жапайы өскөн кара куурайлар да толугу менен тазаланды.
Адистердин айтымында, мындай иш-чаралар баңгизаттык касиетке ээ жапайы өсүмдүктөрдүн жайылышына бөгөт коюу, коомдук коопсуздукту камсыздоо жана айлана-чөйрөнү таза сактоо максатында өткөрүлүүдө.
Тиешелүү кызматтар бул багыттагы иштер мындан ары да улантылып, калаа аймагындагы жапайы өскөн кара куурайларды өз убагында аныктоо жана жок кылуу боюнча иштер үзгүлтүксүз жүргүзүлөрүн белгилешти.
