Манас шаарында акылдуу технологияларды киргизүү маселесин талкуулашты
Манас шаарынын мэри Уларбек Исмаилов Project Vision AI компаниясынын өкүлдөрү менен жолугушуп, жасалма интеллектке негизделген мүмкүнчүлүктөр, анын инфратүзүмдү жакшыртуудагы артыкчылыктары тууралуу маалымат алды.
Калаа мэриясынан билдиришкендей, жолугушууда акылдуу мамыларды шаар аймагына орнотуу, коомдук коопсуздукту күчөтүү жана шаар тургундары үчүн ыңгайлуу шарттарды түзүү маселелери талкууланды.
Компания өкүлдөрү Smart Pole системасы аркылуу көчөлөрдү жарыктандыруу, видеокөзөмөл жүргүзүү, энергияны үнөмдөө жана жасалма интеллекттин негизинде маалыматтарды талдоо сыяктуу бир катар кызматтарды бир түзүмгө бириктирерин белгилешти.
Ошондой эле мындай технологиялар шаардык кызматтардын ишин натыйжалуу уюштурууга, өзгөчө кырдаалдарга ыкчам жооп берүүгө жана шаарды башкаруунун санариптик деңгээлин жогорулатууга мүмкүнчүлүк түзөрү айтылды.
Жолугушуунун соңунда тараптар Smart Pole долбоорун этап-этабы менен ишке ашыруунун мүмкүн болгон багыттарын биргелешип кароого макулдашты.
