Канаттууларды тор менен кармаган чет элдик жаранга 20 миң сом айып салынды

Социалдык тармактарда канаттууларды тор менен кармап жаткан видео тарагандан кийин Жаратылыш ресурстары, экология жана техникалык көзөмөл министрлигинин Нарын регионалдык башкармалыгы текшерүү жүргүздү.

Министрликтин маалыматына ылайык, мыйзам бузууга шектелген чет элдик жаран кармалып, Ак-Талаа райондук ички иштер бөлүмүнө жеткирилген.

Текшерүүнүн жыйынтыгында Укук бузуулар жөнүндө кодекске ылайык чет элдик жаранга 20 миң сом өлчөмүндө административдик айып пул салынды.

Учурда окуя боюнча тиешелүү органдар тарабынан тергөөгө чейинки иш-чаралар жүргүзүлүп, бардык жагдайлар такталууда. Текшерүүнүн жыйынтыгына ылайык, чет элдик жарандын аракеттерине Кыргыз Республикасынын мыйзамдарына ылайык укуктук баа берилет.