"Манас" эл аралык аэропортун реконструкциялоо иштери 90% аяктады

50 жылдан ашык тарыхы бар "Манас" эл аралык аэропортунун реконструкциясы соңуна чыгып калды. Учурда курулуш иштеринин 90%ы бүткөрүлүп, объектти пайдаланууга берүү даярдыгы жүрүүдө. Бул тууралуу Курулуш, архитектура жана турак жай-коммуналдык чарба министрлигинен билдиришти.

Маалыматка ылайык, "Манас" эл аралык аэропортун реконструкциялоо иштери 2025-жылы башталган. Долбоор министрлик тарабынан иштелип чыгып, курулуш "Кыргызстан аэропорттору" ААК менен биргеликте жүргүзүлүүдө.

Министрлик белгилегендей, акыркы жылдары өлкөдө социалдык объектилер менен катар ири инфраструктуралык долбоорлорду куруу, реконструкциялоо жана капиталдык оңдоо иштери активдүү жүргүзүлүп жатат.

Учурда министрликтин карамагында социалдык жана маданий багыттагы 500дөн ашык объекттин курулушу жүрүүдө. Алардын арасында ири спорттук курулмалар, маданий жана туристтик комплекстер бар.

Ошондой эле "Ала-Тоо Резорт" тоо-лыжа комплекси, Таластагы "Баластан" балдар оюн-зоок борбору, "Манас Ордо" улуттук комплекси, "Чыңгыз Айтматов Ааламы" тарыхый-маданий комплекси жана "Манас-2" эл аралык аэропортунун жаңы терминалы сыяктуу ири долбоорлор ишке ашырылууда.

Маалыматка ылайык, бул объектилердин бир бөлүгүн 2026-жылы Эгемендүүлүк күнүнө карата пайдаланууга берүү пландалууда.