Соцтармактагы видеодон кийин: "Дария" теплоходуна 23 миң сом айып салынды
Социалдык тармактарда 12-июлда Ысык-Көлдө коюу кара түтүн чыгарып бара жаткан "Дария" теплоходу тууралуу видео жарыялангандан кийин Экологиялык жана техникалык көзөмөл кызматы текшерүү жүргүздү.
Жаратылыш ресурстары, экология жана техникалык көзөмөл министрлигинин маалыматына ылайык, видеоматериалды изилдөөнүн жыйынтыгында теплоходду эксплуатациялоо учурунда атмосферага чыгарылган булгоочу заттардын курамы боюнча белгиленген ченемдердин ашкандыгынын белгилери аныкталган.
Текшерүүнүн жыйынтыгында теплоход мыйзам талаптарын бузуу менен пайдаланылганы тастыкталып, Укук бузуулар жөнүндө кодекске ылайык укук бузуу жөнүндө протокол түзүлдү. Натыйжада күнөөлүү тарапка 23 миң сом өлчөмүндө административдик айып пул салынды.
Ошондой эле теплоходдун ээси менен жаратылышты коргоо мыйзамдарынын талаптарын сактоо боюнча түшүндүрүү иштери жүргүзүлгөн.
Министрлик билдиргендей, учурда теплоходду жеринде кайра кароо учурунда атмосферага чыгарылган булгоочу заттардын курамы белгиленген ченемден ашканы аныкталган жок.
