2030-жылга чейин 106 суу сактагыч куруу пландалууда
Президент Садыр Жапаровдун тапшырмасынын негизинде өлкөнүн суу чарба тармагын өнүктүрүү, ирригациялык инфраструктураны жаңылоо жана калкты сапаттуу суу менен камсыздоо багытында масштабдуу иштер жүргүзүлүүдө. Бул тууралуу президенттин өзгөчө тапшырмалар боюнча атайын өкүлү Бакыт Төрөбаев билдирди.
Маалыматка таянсак, аталган тапшырмаларды ишке ашыруунун алкагында “Кыргызсуу долбоору” мамлекеттик мекемеси тарабынан суу чарба объектилерин долбоорлоо, куруу жана жаңылоо боюнча маанилүү иштердин аткарылышын көзөмөлдөн өткөрүлдү.
2030-жылга чейин 106 жаңы суу сактагычты куруу жана суу чарба инфраструктурасын заманбап талаптарга ылайык жаңылоо пландалууда. Бул долбоорлор ишке ашкан учурда дыйкандарды сугат суусу менен үзгүлтүксүз камсыздоо, айыл чарба өндүрүшүнүн көлөмүн көбөйтүү жана өлкөнүн азык-түлүк коопсуздугун чыңдоо үчүн чоң мүмкүнчүлүк түзүлөт.
Суу көйгөйүн системалуу чечүү айыл чарба тармагындагы өндүрүмдүүлүктү 70%ге дейре жогорулатып, дыйкан-фермерлер үчүн жаңы мүмкүнчүлүктөрдү ачат. Натыйжада аймактардын экономикалык активдүүлүгү өсүп, калктын жашоо сапатын жакшыртууга өбөлгө болот.
