“Кыргызалтын Резорт” ден соолукту чыңдоо борборунун ачылышы болду
Министрлер Кабинетинин Төрагасынын орун басары Эрлист Акунбеков Ысык-Көл облусунда “Кыргызалтын Резорт” ден соолукту чыңдоо борборунун ачылышына катышты. Бул тууралуу президенттик админстрациянын маалыматтык саясат бөлүмүнөн билдиришти.
Маалыматка ылайык, “Кыргыз деңизи” санаторийин комплекстүү жаңылоонун биринчи этабы аяктагандан кийин, “Кыргызалтын Резорт” ден соолукту чыңдоо борбору катары ишке кирди. Өткөн жылы президент Садыр Жапаровдун тапшырмасынын негизинде бул объект тоо-кен тармагында эмгектенген кызматкерлердин эс алуусун жана ден соолугун чыңдоону уюштуруу максатында “Кыргызалтын” ачык акционердик коомунун башкаруусуна өткөрүлүп берилген.
1975-жылы негизделген “Кыргыз деңизи” санаторийи өлкөнүн эң ири жана белгилүү ден соолукту чыңдоо жайларынын бири болуп келген. Бирок имараттардын жана инженердик коммуникациялардын узак мөөнөт пайдаланылышына байланыштуу объектти комплекстүү оңдоп-түзөө зарылдыгы жаралган.
Жаңыланган башкы корпус, инженердик инфраструктура жана борбордун аймагы менен конок бөлмөлөрү заманбап талаптарга ылайык толугу менен оңдолуп, жаңы эмерек жана техникалар менен жабдылды. Ошондой эле узундугу 205 метрди түзгөн заманбап пирс ишке кирди, 2009-жылдан бери иштебей турган ачык бассейн пайдаланууга берилди. Учурда эл аралык стандарттарга жооп берген көп функционалдуу спорт комплексинин курулушу уланууда.
