Жалал-Абадда битум заводу текшерилип, талапка жооп берсе сертификат берилет
Курулушта сертификаттоонун республикалык борборунун Түштүк аймактык башкармалыгынын адистери Сузак районунда жайгашкан мунай битумун өндүрүүчү заводдо сертификациялык иштерди жүргүздү.
Курулуш, архитектура жана турак жай-коммуналдык чарба министрлигинин маалыматына ылайык, адистер Курук-Сай тилкесиндеги заводго барып, өндүрүш технологиялары менен таанышып, өндүрүмдү даярдоодо коюлган техникалык талаптардын сакталышын текшеришти.
Иш-чаранын алкагында лабораториялык сыноолорду өткөрүү үчүн заводдо чыгарылган битумдан үлгүлөр алынды.
Сыноолордун жыйынтыгы менен өндүрүмдүн белгиленген ченемдик талаптарга жооп берери бааланат. Анын негизинде мунай битумуна шайкештик сертификатын берүү же берүүдөн баш тартуу боюнча чечим кабыл алынат.
