"Социалдык контракт" программасы аркылуу 7 миңден ашуун үй-бүлө жардам алды
Эмгек, социалдык камсыздоо жана миграция министрлиги турмуштук оор кырдаалга кабылган аз камсыз болгон жана жакыр үй-бүлөлөрдүн жашоо деңгээлин жогорулатууга багытталган киреше алып келүүчү “Социалдык контракт” программасын ишке ашырууну улантууда.
Эмгек, социалдык камсыздоо жана миграция министрлигинин маалыматына ылайык, 2026-жылдын биринчи жарым жылдыгынын жыйынтыгы боюнча республика боюнча 7 042 социалдык контракт түзүлдү. Программанын басымдуу бөлүгү айыл чарба тармагында ишке ашырылууда.
“Социалдык контракт” программасы президенттин демилгеси менен 2022-жылдан тартып ишке ашырылып келет. Анын негизги максаты – үй-бүлөлөргө өз ишин баштоого көмөк көрсөтүү, туруктуу киреше булагын түзүүгө жана жашоо шартын жакшыртууга шарт түзүү.
Алгач мамлекеттик колдоонун өлчөмү 100 миң сомду түзгөн болсо, 2025-жылдан тартып ал 150 миң сомго чейин көбөйтүлгөн. Программа өзүнүн жогорку натыйжалуулугун көрсөтүүдө: алгачкы катышуучулардын ичинен 15 үй-бүлөнүн жылдык кирешеси 1 миллион сомдон ашты.
Долбоордун катышуучуларынын көпчүлүгүн айыл жергесинде жашаган аялдар түзөт.
2026-жылы программага 13 334 аз камсыз болгон жана жакыр үй-бүлө катыша алат. Алардын ар бири өзүнүн бизнес-долбоорун ишке ашыруу үчүн 150 миң сом өлчөмүндө кайтарымсыз мамлекеттик колдоого ээ болот.
Мындан тышкары, Министрлик “Социалдык контракт” долбоорунун катышуучулары үчүн пайызсыз насыя берүү программасын ишке ашырууда. 2026-жылдын башынан бери 150 адам жеңилдетилген насыя алып, анын аркасында өз ишкердигин кеңейтүүгө жана өнүктүрүүгө мүмкүнчүлүк алышты.
