Абдрахманов көчөсүндөгү жол өтмөктө унаа кыймылы убактылуу чектелет
Бишкек шаарынын мэриясы Абдрахманов көчөсүндөгү жол өтмөктө курулуш иштери улантылып жатканын билдирди.
Маалыматка ылайык, учурда жол өтмөктүн шып бөлүгүн каптоо жана жылуулук тармактарынын инженердик коммуникацияларын орнотулуп жатат.
Аталган иштерге байланыштуу бүгүн саат 18:00дөн тартып дүйшөмбү күнгө чейин Абдрахманов көчөсүнүн Бөкөнбаев көчөсүнөн Кулатов көчөсүнө чейинки бөлүгүндө түштүк багыттагы унаа кыймылынын бир тилкеси убактылуу жабылат.
Жол кыймылы киргизилген чектөөлөргө ылайык уюштурулат. Айдоочулардан каттамдарын алдын ала мерчемдеп, убактылуу жол белгилеринин талаптарын сактоо жана коопсуздук кызматкерлеринин көрсөтмөлөрүн аткаруу суралды.
