Бишкекте мыйзамсыз объектилер буздурулууда
Бишкек шаарынын мэриясынын Жер пайдаланууну көзөмөлдөө башкармалыгы Д.Садырбаев жана А.Масалиев көчөлөрүнүн кесилишинде мыйзамсыз орнотулган жеңил конструкциядагы объектилерди бузууда. Бул тууралуу Бишкек шаардык мэриясынан билдиришти.
Маалыматка ылайык, текшерүүнүн жүрүшүндө башкармалыктын адистери муниципалдык жер тилкесинде өз алдынча курулуш жүргүзүү жана жерди мыйзамсыз пайдалануу фактыларын аныкташкан. Анын негизинде Укук бузуулар жөнүндө кодексине ылайык мыйзам бузган тарапка жалпы суммасы 180 миң сом өлчөмүндө айып пул салынды.
Ошондой эле Жер кодексинин талаптарына ылайык муниципалдык жер тилкесин иш жүзүндө пайдалангандыгы үчүн төлөмдүн өлчөмү эсептелди.
Жүргүзүлүп жаткан иштердин жыйынтыгында 2 миң чарчы метрден ашык муниципалдык аймак бошотулат.
Жер пайдаланууну көзөмөлдөө башкармалыгы чакан, орто жана ири бизнес өкүлдөрүн жер мыйзамдарынын талаптарын так сактоого, муниципалдык жерлерди өз алдынча ээлеп албоого жана берилген жер тилкелеринин белгиленген чегинен чыкпоого чакырат.
