Чаткалдагы жарактан чыккан көпүрө калыбына келтирилет
Чаткал районунун акими Алтынбек Сеңирбаев Каныш-Кыя айыл аймагына караштуу Чандалаш айылындагы авариялык абалдагы көпүрөнүн учурдагы абалы менен жеринен таанышты.
Райондук админстрациянын маалыматына ылайык, кароо учурунда көпүрөнүн жергиликтүү тургундардын коопсуздугу үчүн олуттуу коркунуч жаратып жаткандыгы белгиленип, абалды тез арада жөнгө салуу маселеси талкууланды.
Ошондой эле район акими жергиликтүү калктын каттамын үзгүлтүккө учуратпоо максатында мурда пайдаланылып келген эски көпүрөнү оңдоп-түзөөдөн өткөрүп, кайра пайдаланууга берүү боюнча тиешелүү мекеме-ишканалардын жетекчилерине конкреттүү тапшырмаларды берди.
Берилген тапшырмалардын негизинде эски көпүрөнү оңдоп-түзөө иштерин жүргүзүү үчүн Чаткал районун өнүктүрүү фондунун өзгөчө кырдаалдарга каралган акча каражатынан 600 миң сом бөлүү чечими кабыл алынды. Аталган каражат көпүрөнү оңдоо иштерин жүргүзүү үчүн №27 Жол тейлөө мекемесине бөлүнүп берилет.
Берилген тапшырмалардын өз убагында жана сапаттуу аткарылышы райондук мамлекеттик администрациянын көзөмөлүндө болот.
