Чүйдө курулуш мыйзамдарын бузгандарга 1 млн сомдон ашык айып пул салынды
Шаар куруу жана архитектура мыйзамдарынын талаптарын бузган "Арал-Боом", "Мостострой отряд" мамлекеттик ишканасы, "Авира Групп", "Бишкек Инвест" жана "Бишкек Дистрибьюшн" жоопкерчилиги чектелген коомдоруна жалпы суммасы 1 млн сомдон ашык айып пул салынды.
Курулуш, архитектура жана турак жай-коммуналдык чарба министрлигинен билдиришкендей, Мамлекеттик архитектура-курулуш көзөмөлдөө департаментинин Чүй регионалдык башкармалыгы курулуштагы мыйзамдардын сакталышын камсыздап келет.
Мекеменин маалыматына ылайык, текшерүүлөрдүн жүрүшүндө уруксат берүүчү жана долбоордук документтердин болушу, бекитилген долбоорго шайкештиги, ошондой эле курулуш ченемдеринин жана эрежелеринин аткарылышы текшерилди.
Мындан тышкары, аталган жактарга мыйзам бузууларды белгиленген мөөнөттө жоюу боюнча тиешелүү жазуу түрүндөгү көрсөтмөлөр берилди.
Бүгүнкү күнгө карата Чүй облусунун аймагындагы курулуш индустриясынын объекттерине, тактап айтканда, 25 юридикалык жана жеке тарапка текшерүү жүргүзүлдү.
