Эскертүү: Балыкчыда расмий катталган эки кум жээкте гана куткаруучулар бар

Балыкчы шаарында сууга түшүүгө расмий уруксат берилген жана куткаруучулар нөөмөттө турган эки гана кум жээк бар. Бул тууралуу калаанын Өзгөчө кырдаалдар бөлүмү билдирди.

Маалыматка ылайык, шаардагы "Green City Center" жана "Толкун" кум жээктеринде гана эс алуучулардын коопсуздугу үчүн бардык шарттар түзүлүп, куткаруучулар үзгүлтүксүз нөөмөттө турушат.

Ал эми "Алия" аймагында сууга түшүүгө тыюу салынат. Себеби бул жер расмий пляж болуп саналбайт, куткаруучулар жок жана куткаруу шаймандары менен камсыздалган эмес.

Өзгөчө кырдаалдар бөлүмү тараткан расмий эскертүүгө ылайык, аталган аймактын суусунун түбүндө калың балырлар, күтүүсүз терең жерлер, темир калдыктары жана курулуш материалдары кездешет. Ошондой эле сууга чөккөн учурлар катталган.

Мындан тышкары, көл жээгине баруучу жол темир жол аркылуу өткөндүктөн, поезд каттамына байланыштуу кошумча коркунуч жаралат.

Өзгөчө кырдаалдар бөлүмү шаар тургундарын жана конокторун коопсуздук эрежелерин сактоого, балдарды кароосуз калтырбоого жана расмий уруксат берилген кум жээктерде гана эс алууга чакырды.