Айрым аймактарда 19-20-июлда абанын табы адаттан тыш жогорулайт
19-20-июлда өлкө аймагында абанын табы кескин жогорулайт. Бул тууралуу Кыргызгидромет кызматы маалымдады.
Билдирүүгө ылайык, Чүй, Ош, Баткен жана Жалал-Абад облустарында күндүз абанын температурасы +41...+43 градуска чейин жетет.
Кыргызгидромет күндүн эң ысык маалында сыртта көп жүрбөөгө, жетиштүү суюктук ичүүгө жана өсүмдүктөрдү үзгүлтүксүз сугарууга чакырды.
Ошондой эле абанын кескин ысышынан улам мөңгүлөрдүн жана кардын эришинен айрым аймактарда суунун деңгээли көтөрүлүп, дарыялардын нугунан ашып кетүү коркунучу бар экенин эскертишти.
Метеорологдордун айтымында, Бишкекте июлда абанын температурасы 41 градуска чейин 2017, 2019 жана 2021-жылдары жеткен. Ал эми 2022, 2023 жана 2024-жылдары эң жогорку температура 40 градус болгон.
Ал эми аймактар боюнча айтсак, 2021-жылы 27-июлда Манас шаарында 44 градуска, 8-августта Айтматов районунда температура 40 градуска жеткен. 2022-жылы Баткенде 40 градус ысык болгон. 2025-жылы 4-июлда Талас шаарында абанын температурасы 38 градуска көтөрүлгөн.
