“Алтынкен” ишканасы тоо бооруна эки тилде жазылган ураан боюнча үн катты
Чүй облусундагы кыргыз-кытай биргелешкен “Алтынкен” ишканасы өзү жайгашкан аймактагы тоо бооруна түшүрүлгөн эки тилде жазылган ураанды алып салуу иштерин баштады. Бул тууралуу аталган компаниядан билдиришти.
Маалыматка ылайык, тоодогу жазуу 2015-жылы экологияны сактоого чакырык катары ошол кездеги бийликтин талабы менен түшүрүлгөн. Ишкана анын саясий мааниси жок экенин, жаратылышка аяр мамиле кылууга үндөгөн экологиялык ураан болгонун белгиледи.
Компаниянын айтымында, ал кезде жергиликтүү жарандар менен катар Кытайдан келген адистер да иштегендиктен, жазуу эки тилде берилген. Учурда ишканадагы кызматкерлердин 95%ын Кыргызстандын жарандары түзөт.
Буга чейин социалдык тармактарда Кемин районундагы кен аймагындагы кытай тилиндеги жазуу талкуу жаратып, айрым колдонуучулар аны сынга алышкан.
Расмий маалыматтарга ылайык, “Алтынкен” ишканасы Чүй облусунун Кемин районундагы Орловка айылында жайгашкан. Ал 2006-жылы негизделип, 2015-жылы Кытай менен биргелешкен компания катары түзүлгөн. Кыргызстандын үлүшү 40%, Кытайдын үлүшү 60%ды түзөт.
