Автобус катышкан жол кырсыгына байланыштуу эки жетекчи иштен кетти
Бишкек шаарынын мэри Айбек Жунушалиевдин төрагалыгы алдында мэрияда Жаш Гвардия бульварында муниципалдык автобус катышкан жол кырсыгы боюнча кызматтык иликтөөнүн жыйынтыгы каралды. Бул тууралуу Бишкек шаардык мэриясынан билдиришти.
Маалыматка ылайык, мэрдин орун басары Атай Муратбеков кызматтык иликтөөнүн жыйынтыгы боюнча комиссия транспорт комплексинин ишин көзөмөлдөөнү уюштурууда бир катар кемчиликтерди аныктаганын маалымдады. Анын ичинде Транспорт жана жол-транспорт инфратүзүмдү өнүктүрүү департаментинин директорунун тармакты көзөмөлдөгөн орун басарынын, ошондой эле “Бишкек шаардык транспорт” муниципалдык ишканасынын директорунун ишинде да кемчиликтер белгиленген.
Бишкек шаарынын мэри Айбек Жунушалиев негизги милдет күнөөлүү адамдарды жоопкерчиликке тартуу менен гана чектелбестен, кырсыктын келип чыгышына өбөлгө болгон системалык себептерди аныктап, аларды жоюу экенин баса белгиледи.
Кызматтык иликтөөнүн жыйынтыгында төмөнкүдөй кадрдык чечимдер кабыл алынды:
Мэрдин орун басары Рамиз Алиевге катуу сөгүш жарыяланды;
Транспорт жана жол-транспорттук инфратүзүмдү өнүктүрүү департаментинин директору Улан Бейшенбаевге катуу сөгүш жарыяланды;
Транспорт жана жол-транспорттук инфратүзүмдү өнүктүрүү департаментинин директорунун орун басары Алмаз Алымбеков ээлеген кызматынан бошотулду;
“Бишкек шаардык транспорт” муниципалдык ишканасынын директору Талантбек Капаров ээлеген кызматынан бошотулду.
