Быйыл 3 643 үй-бүлө азык-түлүк, 1 320 үй-бүлө акчалай жардам алды
Аз камсыз болгон үй-бүлөлөрдү колдоого багытталган долбоордун алкагында өлкө боюнча 3 643 үй-бүлөгө жардам көрсөтүлдү. Бул тууралуу Эмгек, социалдык камсыздоо жана миграция министрлиги билдирди.
Маалыматка ылайык, долбоор БУУнун Дүйнөлүк азык-түлүк программасы менен биргеликте ишке ашырылууда.
Белгиленгендей, анын алкагында жыл башынан бери республика боюнча инфратүзүмдүк, окутуучу жана киреше алып келүүчү 127 долбоор ишке ашырылды. Аларга 18 миң 285 жаран катышып, жалпы 1 миң 151 тоннадан ашык азык-түлүк таратылды.
Мындан сырткары, министрлик тарабынан калктын эң аялуу катмарларын шашылыш колдоого багытталган "Коомдук пайдалуу иштерге (окутууга) катышуунун ордуна накталай акча каражаттары" схемасы боюнча ишке ашырылган долбоорлорго 1 320 аз камсыз болгон үй-бүлө (4 782 жаран) катышты. Төлөнгөн акча каражаттарынын жалпы суммасы 19,1 млн сомду түздү.
Долбоорлор аз камсыз болгон үй-бүлөлөрдү колдоого, алардын киреше табуу мүмкүнчүлүктөрүн кеңейтүүгө жана социалдык абалын жакшыртууга багытталганы айтылат.
