Чоң-Таш жайлоосунда жер кыртышына тийген зыян 75 миң сом деп эсептелди
Жалал-Абад облусунун Кара-Көл шаарында экологиялык мыйзам бузуулар аныкталды. Бул тууралуу Жаратылыш ресурстары министрлигинен билдиришти.
Маалыматка ылайык, Экологиялык жана техникалык көзөмөл кызматынын аймактык башкармалыгы Чоң-Таш жайлоосунда өндүрүш калдыктары мыйзамсыз төгүлгөнүн аныктады. Анын кесепетинен жер кыртышына 75 миң 168 сом өлчөмүндө зыян келген.
Ошондой эле аталган жайлоонун Бытый жер тилкесинде жайыт жер мыйзамсыз айдалганы аныкталып, келтирилген зыян 51 миң 800 сомду түзгөн.
Мындан тышкары, Курп-Сай суу сактагычынын Эш-Сай тилкесинде диаметри 21 сантиметр болгон дарак мыйзамсыз кыйылганы аныкталып, зыян 3 миң 50 сом деп бааланган.
Учурда аныкталган фактылар боюнча тиешелүү териштирүү иштери жүргүзүлүп, мыйзам чегинде чаралар көрүлүүдө.
