Курулуш эрежелерин бузган компанияларга 1 млн сомдон ашык айып пул салынды

Курулуш, архитектура жана турак жай-коммуналдык чарба министрлигине караштуу Мамлекеттик архитектура-курулуш контролдоо департаментинин Чүй регионалдык башкармалыгы архитектура, шаар куруу жана курулуш мыйзамдарынын талаптарынын сакталышын камсыздоо максатында туруктуу көзөмөл жүргүзүүдө. Бул тууралуу аталган министрликтен билдиришти.

Маалыматка ылайык, көзөмөлдөө иш-чараларынын алкагында уруксат берүүчү жана долбоордук документтер, шаар куруу мыйзамдарынын талаптарынын аткарылышы, курулуш иштеринин бекитилген долбоордук документацияга шайкештиги, ошондой эле өндүрүш объекттерин эксплуатациялоодо курулуш ченемдеринин жана эрежелеринин сакталышы текшерилди.

Бүгүнкү күнгө карата Чүй облусунун аймагындагы курулуш индустриясынын объекттерине, анын ичинде бетон-эритме түйүндөрүнө, асфальт-бетон заводдоруна жана майдалоо-сорттоо комплекстерине караштуу 25 юридикалык жана жеке жакка текшерүү жүргүзүлдү.

Текшерүүнүн жыйынтыгында шаар куруу жана архитектура мыйзамдарынын талаптарын бузган “Арал-Боом”, “Мостострой отряд” мамлекеттик ишканасына, “Авира Групп”, “Бишкек Инвест” жана “Бишкек Дистрибьюшн” ЖЧКларына карата жалпы суммасы 1 000 000 сомдон ашык өлчөмдө айып пул салынды.

Ошондой эле аныкталган мыйзам бузууларды белгиленген мөөнөттө жоюу боюнча жазуу түрүндө көрсөтмөлөр берилди.