Ош: “Кунь-Лунь” компаниясы кошумча жер аянтын мыйзамсыз пайдаланган
Ош шаарында жер тилкесин мыйзамсыз пайдалануу фактысы аныкталып, “Кунь-Лунь” ЖЧКсына 100 миң сом айып пул салынды. Бул тууралуу Жерди жана сууну көзөмөлдөө кызматынын Ош шаары жана Ош облусу боюнча аймактык башкармалыгы билдирди.
Маалыматка ылайык, аталган компания Ош шаарынын Жапалак айыл аймагынын Озгур айылында жайгашкан.
Текшерүүнүн жүрүшүндө ишкана өзүнө бөлүнүп берилген жер тилкесинен тышкары кошумча жер аянтын мыйзамсыз пайдаланып жатканы аныкталды.
Аталган факты боюнча текшерүү актысы, жазма буйрук жана укук бузуу жөнүндө протокол түзүлүп, "Укук бузуулар жөнүндө" кодексинин 149-беренесине ылайык компанияга 100 миң сом өлчөмүндө айып пул салынды.
