Таласта аткарылбаган курулуш иштери үчүн 4,2 млн сом төлөнгөнү аныкталды
Талас облусунун Айтматов районундагы мектептин курулушунда 4,2 млн сомдук мыйзам бузуу аныкталып, кылмыш иши козголду. Бул тууралуу Башкы прокуратура билдирди.
Маалыматка ылайык, Айтбаев орто мектебинин курулушуна жүргүзүлгөн текшерүүдө казынанын каражаттарын мыйзамсыз пайдалануу фактылары аныкталган.
Текшерүүдө облустук капиталдык курулуш башкармалыгынын жооптуу кызмат адамдары иш жүзүндө аткарылбаган курулуш иштерин расмий документтерге киргизип, подряддык уюмга 4 млн 200 миң сом каражатты мыйзамсыз төлөп беришкен.
Аталган факты боюнча Кылмыш-жаза кодексинин "Кызмат абалынан кыянаттык менен пайдалануу" жана "Кызматтык жасалмачылык" беренелери менен кылмыш иши козголду.
Учурда иш боюнча тергөө амалдары уланууда.
