Жалал-Абадда мыйзамсыз башталган курулуш үчүн 200 миң сом айып салынды
Жалал-Абад региондук башкармалыгы Тарсус көчөсү 68 дарегинде курулуп жаткан объектте мыйзам бузууларды аныктап, курулуш иштерин убактылуу токтотту. Бул тууралуу Курулуш, архитектура жана турак жай-коммуналдык чарба министрлиги билдирди.
Маалыматка ылайык, министрликке караштуу Мамлекеттик архитектура-курулуш көзөмөлдөө департаментинин аймактык башкармалыгы аталган объектке пландан тышкаркы текшерүү жүргүзгөн.
Текшерүүдө курулуш иштери бекитилген долбоордук-сметалык документтерсиз жана мамлекеттик экспертизанын оң корутундусу жок башталганы аныкталган. Ошондой эле 7 метр тереңдиктеги жер казуу иштери шаар куруу талаптарын бузуу менен жүргүзүлгөнү белгиленген.
Мындан тышкары, курулуш аянтында коопсуздук чаралары толук камсыздалбай, коргоочу тосмо жана жарыктандыруу орнотулган эмес. Ошондой эле казылган жер турак үйдүн пайдубалына жана жөө жүргүнчүлөр өтүүчү аймакка жакын жайгашып, кооптуу жагдай жаратканы айтылды.
Аталган мыйзам бузуулар боюнча “С.С. Строй” ЖЧКсына 200 миң сом өлчөмүндө айып пул салынып, курулуш иштери токтотулган. Учурда объектти коопсуздук талаптарына ылайыкталып, курулуш аянтын тосулуп жатат.
