Бишкекте коомдук транспорттордо рейд өтүүдө
2026-жылдын 1-июлунан тартып Бишкек шаарында “Бишкек шаардык транспорту” муниципалдык ишканасы коомдук транспортто жол киренин төлөнүшүн көзөмөлдөө максатында рейддик текшерүүлөрдү жүргүзүүдө. Бул тууралуу Бишкек шаардык мэриясынан билдиришти.
Маалыматка таянсак, текшерүүчүлөр жүргүнчүлөрдүн жол кирени төлөгөнүн, ошондой эле банк картасы, QR-код же башка ыкмалар менен төлөгөн учурда төлөмдү тастыктаган электрондук же кагаз түрүндөгү чектин бар-жогун текшеришет.
“Бишкек шаардык транспорту” бардык жүргүнчүлөрдү жол кирени өз убагында төлөп, текшерүү аяктаганга чейин төлөмдү тастыктаган чекти сактап жүрүүгө чакырат.
Коомдук транспортто жол киресин төлөбөгөн жүргүнчүлөр административдик жоопкерчиликке тартылып, 1000 сом өлчөмүндө айып пулга тартылат.
Муниципалдык ишкана борбор калаанын тургундарын жана конокторун коомдук транспортту пайдалануунун эрежелерин так сактоого жана жол кирени өз убагында төлөөгө чакырат.
