Мамлекеттик маанилүү иш-чараларга байланыштуу дрон учурууга чектөө киргизилет
Бишкек шаарында, ошондой эле Чүй жана Ысык-Көл облустарында учкучсуз учуучу аппараттарды жана чакан авиацияны пайдаланууга убактылуу чектөө киргизилет.
Жарандык авиация мамлекеттик агенттигинин маалыматына ылайык, бул чектөө Шанхай кызматташтык уюмунун саммитине, VI Дүйнөлүк көчмөндөр оюндарына, Борбор Азия мамлекеттеринин жана Азербайжандын башчыларынын консультативдик жолугушуусуна, ошондой эле F1H2O суу-мотор спорту боюнча дүйнө чемпионатына даярдык көрүү жана өткөрүү мезгилинде күчүндө болот.
Тыюу бардык түрдөгү учкучсуз учуучу аппараттарга, анын ичинде ышкыбоздор колдонгон квадрокоптерлерге, ошондой эле параплан, дельтаплан, жеңил учактар жана жеке тик учактар сыяктуу чакан авиация каражаттарына тиешелүү.
Мамлекеттик органдар менен алдын ала макулдашылбаган бардык учуулар Кыргызстандын аба мейкиндигин пайдалануу эрежелерин бузуу катары каралат.
Мындай мыйзамсыз учуулар үчүн административдик жана кылмыш жоопкерчилиги каралган. Мындан тышкары, укук коргоо органдары мыйзам бузгандардын техникаларын конфискациялоого укуктуу.
