Садыр Жапаров: Кыргызстанга 13 миллион турист келди
Президент Садыр Жапаров Фейсбук баракчасы аркылуу кайрылуу кылды. Ал туризм жаатында өсүш байкалганын билдирди.
Анын айтымында, 2020-2021-жылга чейин өлкөгө 2-3 миллион турист келип жүргөн болсо, бүгүн туристтердин саны 13 миллионго жетти.
“Бул деген экономиканын өскөнүн, өлкөбүздүн аты дүйнөгө дүңгүрөп аткандыгын, туристтерди өзүнө тартып жатканын билдирет. Биз 7 миллион эле калкпыз.
Эки эсе көп турист келди деген сөз, ИДПнын өсүшүнө 4-5% кошумча болду деген сөз. Дүйнө өлкөлөрү өздөрүнүн мамлекетине туристерди чакырып, жарнама кылыш үчүн миллиарддаган каражат колдонушат. Бизге болсо туристтер өздөрү агылып келип жатканына сүйүнүшүбүз керек”, - дейт президент.
"Аларды жакшылап тосуп алышыбыз керек. Себеби ар бир турист ИДПга салым кошот. Бул деген сөз ар бир турист ар бир Кыргызстандыктын жакшы жашоосуна салым кошуп кетти деген сөз. Кен байлыктарыбыз бир кезде түгөнөт. Туризм түбөлүк калат. Келечекте өлкөбүздү туризм багат", - деп кошумчалады мамлекет башчысы.
