Эркечтам өткөрүү пункту жаңыланууда
Бажы органдарынын ишмердүүлүгү менен таанышуунун алкагында 16-июлда Мамлекеттик бажы кызматынын төрагасы Алмаз Салиев Эркечтам өткөрүү пунктуна барды. Бул тууралуу Бажы кызматынан билдиришти.
Маалыматка ылайык, иш сапардын жүрүшүндө А.Салиев Эркечтам өткөрүү пунктунун ишмердүүлүгү, ошондой эле өткөрүү пунктунун үзгүлтүксүз иштешин камсыздоо жана көзөмөлдөн өтүү үчүн ыңгайлуу шарттарды түзүү боюнча мамлекеттик көзөмөл органдарынын ишин уюштуруу менен таанышты.
Долбоор аяктагандан кийин өткөрүү пунктунун долбоордук өткөрүү жөндөмдүүлүгү бир багытта 1000 транспорт каражатына чейин жетет.
Бул багытта төмөнкү иштер жүргүзүлүүдө:
өткөрүү пунктунун аймагы 8 гектарга чейин кеңейтилүүдө;
жаңы объекттер курулууда, анын ичинде өткөрүү пунктунун ичинде унаа тилкелери көбөйтүлүп, кирүү үчүн 6 жана чыгуу үчүн 4 тилке уюштурулууда;
саатына 120 транспорт каражатын өткөрүүгө жөндөмдүү заманбап инспекциялык-текшерип кароо комплекси курулууда;
жол инфраструктурасы өнүктүрүлүүдө;
кошумча аянтчалар курулууда.
Мындан тышкары, “ГТИ” ААКка жүргүзүлүп жаткан курулуш иштерин тездетүү, подряддык уюмдар, ошондой эле тиешелүү министрликтер жана мекемелер менен өз ара иш алып барууну жакшыртуу жана активдештирүү аркылуу жаңыланган өткөрүү пунктун мүмкүн болушунча эртерээк аяктап, пайдаланууга берүү боюнча тапшырмалар берилди.
