“Даяр лицензия сатылат”: министрлик ортомчуларга ишенбөөгө чакырды
Курулуш, архитектура жана турак жай-коммуналдык чарба министрлиги жарандарды курулуш лицензиясын ортомчуларсыз, мыйзам талаптарына ылайык алууга чакырды.
Маалыматка ылайык, учурда социалдык тармактарда “Даяр лицензия сатылат”, “Лицензияны тез алып беребиз” деген сунуштар чыгып жатат. Министрлик мындай билдирүүлөргө ишенүү олуттуу тобокелдиктерге алып келиши мүмкүн экенин айтты.
Белгиленгендей, курулуш лицензиясын алуу иштери толугу менен санариптештирилип, документтерди онлайн тапшырууга болот. Бардык талаптар аткарылган учурда лицензия бир күндүн ичинде электрондук түрдө берилет.
Ошондой эле министрлик лицензия сатылуучу же башка жакка өткөрүлүп берилүүчү документ эместигин, аны алган субъектке гана таандык болгонун эскертти.
Эгерде лицензия мыйзамсыз жол менен алынганы аныкталса, тиешелүү чаралар көрүлүп, мыйзам бузган субъекттер кара тизмеге киргизилет.
