Электросталь шаарындагы жардыруудан эки кыргызстандык жараат алды
Россия Федерациясынын Москва облусунун Электросталь шаарында жайгашкан Wildberries компаниясынын кампасында 18-июлунда болгон кырсыкка байланыштуу Эмгек, социалдык камсыздоо жана миграция министрлигинин Россия Федерациясындагы өкүлчүлүгү Кыргызстандын Россия Федерациясындагы элчилиги менен биргеликте кырдаалды көзөмөлгө алып, Россиядагы компетенттүү мамлекеттик органдары менен тыгыз өз ара аракеттенүүдө.
Эмгек, социалдык камсыздоо жана миграция министрлигининмаалыматына ылайык, кырсыктын кесепетинен жабыркаган Кыргызстандын жарандарын аныктоо жана алардын абалы тууралуу маалыматтарды тактоо максатында өкүлчүлүктүн кызматкерлери окуя болгон жерге барып, ошондой эле Россия Федерациясынын өзгөчө кырдаалдар министрлигинин тиешелүү бөлүмүнө жана жабыркаган жарандар жеткирилген медициналык мекемелерге барышты.
Маалым болгондой, кырсыктын кесепетинен Кыргызстандын 2 жараны медициналык мекемелерге жаткырылган, алардын бири дарылануудан өткөндөн кийин ооруканадан чыгарылган.
