Караколдо мамлекеттик тил талаптарына ылайык келбеген жарнамалар оңдолот
23-июлда Каракол шаарында мамлекеттик тил жөнүндө мыйзамдардын талаптарынын аткарылышын көзөмөлдөө максатында текшерүү жүргүзүлдү. Бул тууралуу калаа мэриясынын басма сөз кызматы билдирди.
Иш-чарага президенттин Ысык-Көл облусундагы ыйгарым укуктуу өкүлчүлүгүнүн социалдык бөлүмүнүн башчысы Асангазы кызы Элнура, мэриянын мамлекеттик тил боюнча комиссиясынын мүчөлөрү жана Монополияга каршы жөнгө салуу кызматынын облустук башкармалыгынын адистери катышты.
Текшерүүнүн жүрүшүндө шаардын аймагындагы соода түйүндөрү, дүкөндөр, коомдук тамактануучу жайлар, дарыканалар жана башка коомдук жайлардагы маалыматтардын мыйзам талаптарына шайкештиги каралды.
Тактап айтканда, мекемелердин аталыштары, тышкы жарнамалар, маалымат такталары жана кулактандыруулар "Мамлекеттик тил жөнүндө" конституциялык мыйзамга ылайык жазылышын текшеришти.
Жыйынтыгында айрым жерлерде мамлекеттик тил талаптарына жооп бербеген кемчиликтер аныкталды. Алардын ээлерине мыйзам талаптарына ылайык жазуу боюнча тапшырмалар берилди.
Мындай иш-чаралар Каракол шаарында мамлекеттик тилдин коомдук турмуштагы колдонулушун кеңейтүү жана керектөөчүлөрдүн укуктарын коргоо максатында мындан ары да улантылары белгиленди.
