Өкмөттүк жыйында күйүүчү майдын тарифин жөнгө салуу маселеси каралды
Министрлер Кабинетинин төрагасы Адылбек Касымалиев өлкөдөгү күйүүчү-майлоочу май маселелерине байланыштуу жыйын өткөрдү. Бул тууралуу президенттик админстрациядан билдиришти.
Маалыматка ылайык, отурумда негизинен өлкөнүн ички рыногун мунай заттары менен камсыздоо каралып, анда күйүүчү-майлоочу май рыногундагы учурдагы абал, мунай заттарын импорттоо, зарыл болгон коруктарды камсыздоо, тарифтерди жөнгө салуу, мамлекеттик субсидиянын берилиши сыяктуу иштердин аткарылышы боюнча тиешелүү мамлекеттик органдардын жана уюмдардын жетекчилеринин маалыматы угулуп, талкууланды.
Жыйындын соңунда МинКаб Төрагасы Адылбек Касымалиев отурумдун катышуучуларына өлкөнү мунай заттары менен үзгүлтүксүз камсыздоо, абалдын мониторингин күчөтүү, өлкөдөгү мунайды кайра иштетүүчү заводдорду жаңылоо иштерин күчөтүү жана зарыл болгон чараларды өз убагында көрүү боюнча бир катар тапшырмаларды берди.
