Психиатрия жана наркология борборуна аймактарга дары жеткирүү үчүн унаа берилди
Бириккен Улуттар Уюмунун Өнүктүрүү программасы Республикалык психиатрия жана наркология борборуна заманбап жол тандабас унаа берди.
Маалыматка ылайык, жаңы унаа дары-дармектерди жана медициналык каражаттарды өзгөчө алыскы аймактардагы дарылоо жайларына өз убагында жеткирүүгө мүмкүнчүлүк берет.
Адистердин айтымында, опиоиддерге көз карандылыкты дарылоодо дары-дармектерди үзгүлтүксүз кабыл алуу маанилүү. Эгер убагында жеткизилбей калса, дарылоо үзгүлтүккө учурап, бейтаптардын ден соолугуна терс таасирин тийгизиши мүмкүн.
БУУ Кыргызстанда саламаттыкты сактоо тармагын өнүктүрүүгө багытталган долбоорлорду колдоп келет. Анын ичинде медициналык мекемелерди керектүү жабдуулар жана каражаттар менен камсыз кылуу, калктын аялуу катмарына көрсөтүлүүчү кызматтардын сапатын жакшыртуу боюнча иштер жүргүзүлүп жатканы белгиленди.
