Баткенде сел жүрүп, лагердеги 30 окуучу куткарылды
23-июлда саат 18:30 чамасында Баткен шаарында, ошондой эле Баткен жана Кадамжай райондорунун аймагында нөшөрлөп жааган жаандан кийин сел жүрдү. Бул тууралуу президенттин Баткен облусундагы ыйгарым укуктуу өкүлүнүн басма сөз кызматы билдирди.
Маалыматка ылайык, сел суулары унаа жолдоруна, турак үйлөргө, короо-жайларга жана административдик имараттарга зыян келтирип, айрым унаа жолдорунда каттам убактылуу токтотулду. Ошондой эле кээ бир аймактарда электр энергиясын берүү үзгүлтүккө учурады.
Түзүлгөн кырдаалга байланыштуу президенттин Баткен облусундагы ыйгарым укуктуу өкүлүнүн биринчи орун басары Бактыбек Токсонбаевдин жетекчилигинде облустун жарандык коргонуу кызматтарынын ыкчам кеңешмеси өткөрүлдү.
Жыйында сел катталган аймактардагы кырдаал боюнча маалыматтар угулуп, кесепеттерди жоюу жана калктын коопсуздугун камсыз кылуу боюнча ыкчам чараларды көрүү тапшырылды.
Биринчи кезекте Баткен районунун Алтын-Бешик балдардын эс алуу лагериндеги 30 окуучуну эвакуациялоо тапшырмасы берилди. Балдар учурда коопсуз жайда.
Учурда президенттин Баткен облусундагы ыйгарым укуктуу өкүлү Мамыржан Рахимовдун жетекчилиги алдында облустун жарандык коргонуу кызматтары күчөтүлгөн тартипте иш алып барууда.
