Баткендеги курулуп жаткан объекттер текшерилди
Министр Нурдан Орунтаевдин тапшырмасынын негизинде Курулуш, архитектура жана турак жай-коммуналдык чарба министрлигинин алдындагы Турак жай-жарандык курулуш департаментинин жетекчисинин орун басары Мирлан Бузурманкулов Баткен районунда курулуп жаткан бир катар социалдык объекттердин курулуш иштеринин жүрүшү менен таанышты.
Курулуш, архитектура жана турак жай-коммуналдык чарба министрлигинин маалыматына ылайык, иш сапарынын жүрүшүндө курулуш иштеринин сапаты, аткарылып жаткан жумуштардын жүрүшү жана бекитилген графиктин аткарылышы текшерилди.
Тактап айтканда, төмөнкү объекттер каралды:
Кадамжай районунун Айырбас айылындагы 500 орундуу жаңы мектеп;
Баткен районунун Жаңы-Жер айылындагы 500 орундуу жаңы мектеп;
Баткен районунун Жаңы-Достук айылындагы 225 орундуу мектеп, 100 орундуу бала бакча жана ФАП.
Айырбас айылындагы 500 орундуу мектептин курулушу 2024-жылдын октябрь айында башталган.
Учурда курулуш иштери дээрлик аяктап, эмеректерди орнотуу жана аймакты көрктөндүрүү жумуштары жүргүзүлүүдө. Объекттин жалпы наркы 157 миллион сомду түзөт.
Ал эми Жаңы-Жер айылындагы 500 орундуу мектептин курулушу 2023-жылдын сентябрь айында башталган. Бүгүнкү күндө курулуш-монтаждоо иштеринин акыркы этаптары аткарылууда. Долбоор республикалык бюджеттин эсебинен каржыланып, жалпы наркы 164 миллион сомду түзөт.
Ошондой эле Жаңы-Достук айылында 225 орундуу мектептин, 100 орундуу бала бакчанын жана ФАП курулушу уланууда.
Аталган долбоорлор аймактын социалдык инфраструктурасын өнүктүрүүгө, калкты сапаттуу социалдык кызматтар менен камсыз кылууга жана балдардын коопсуз, заманбап шартта билим алуусуна өбөлгө түзөт.
