Кореяда иштеп келген 126 кыргызстандык жаран пенсиялык топтомдорун алды
Түштүк Кореяда расмий түрдө иштеген Кыргызстандын жарандарына пенсиялык топтомдору боюнча бир жолку төлөмдөр бериле баштады. Бул тууралуу Социалдык фонддон билдиришти.
Маалыматка ылайык, Кыргызстандын жарандары Кореяда иштеп жүргөндө эмгек акысынан кармалган пенсиялык төгүмдөрүн өлкөгө кайтып келгенден кийин белгиленген тартипте кайтарып алышууда.
Кореянын Улуттук пенсиялык кызматынан бир жолку төлөм алуу үчүн бүгүнкү күнгө чейин 149 жаран кайрылган. Алардын ичинен 126 жаранга төлөм дайындалып, толугу менен берилип, дагы 23 жарандын арызы каралууда.
Белгиленгендей, бир жолку төлөмдүн орточо өлчөмү 3 миң 789 долларды түздү.
