Ошто курулуп жаткан мектептер текшерилди
Курулуш министри Нурдан Орунтаевдин тапшырмасына ылайык, Турак жай-жарандык курулуш департаментинин жетекчисинин орун басары Мирлан Бузурманкулов жана “Кыргызкурулуш” мамлекеттик ишканасынын жетекчисинин орун басары Таалайбек Алымкулов Ош шаарында курулуп жаткан 10 жаңы мектептин курулуш-монтаждоо иштеринин жүрүшү менен жеринде таанышып, текшерүү жүргүзүштү.
Курулуш министрлигинин маалыматына ылайык, иш сапардын жүрүшүндө курулуштун сапаты, аткарылышы жана графикке ылайык жүргүзүлүшү каралды. Учурда бардык 10 объектте комплекстүү курулуш иштери жүрүп, жалпы аткарылган иштердин көлөмү 35-45%ды түзөт.
Белгилей кетсек, аталган 10 мектептин курулушу 2026-жылдын февраль айында башталган. Долбоор республикалык бюджеттин эсебинен каржыланып, аймактагы социалдык инфраструктураны өнүктүрүүгө жана окуучулар үчүн заманбап билим берүү шарттарын түзүүгө багытталган.
