Токтогул шаарына 5,7 млн сомго бааланган техникалар тапшырылды
Токтогул шаардык мэриясынын алдындагы муниципалдык “Ыңгайлуу шарт” ишканасынын материалдык-техникалык базасын чыңдоо боюнча дагы бир маанилүү долбоор ийгиликтүү ишке ашырылды. Бул тууралуу Токтогул шаардык мэриясынан билдиришти.
Маалыматка ылайык, шаар тургундарына көрсөтүлүүчү коммуналдык кызматтардын сапатын жогорулатуу, шаарды көрктөндүрүү жана санитардык тазалыкты камсыздоо максатында Жалал-Абад облустук өнүктүрүү фондунун эсебинен жалпы суммасы 5 721 000 сомду түзгөн долбоор каржыланды.
Долбоор президенттин Жалал-Абад облусундагы ыйгарым укуктуу өкүлү Тилек Текебаевдин колдоосу менен ийгиликтүү жүзөгө ашып, анын алкагында муниципалдык ишкана төмөнкү техникалар жана жабдуулар менен камсыз болду:
2 даана электромобилдик техника;
2 даана өзү көтөрүүчү “Желмаян” үлгүсүндөгү техника;
1 даана кар сүрүүчү жана коммуналдык көчө тазалоочу техника;
100 даана таштанды челеги;
15 даана таштанды челектери үчүн чатырча;
4 даана чөп чапкыч.
Алынган техникалар жана жабдуулар муниципалдык кызматтардын натыйжалуулугун жогорулатууга, шаарды көрктөндүрүү иштерин сапаттуу жүргүзүүгө, санитардык тазалыкты камсыздоого өбөлгө түзөт.
