Түндүк – Түштүк жолунда коопсуздук чаралары күчөтүлөт
23-июлда президенттин Нарын облусундагы ыйгарым укуктуу өкүлү Нурбек Сатаров Жумгал районуна болгон иш сапарынын алкагында Түндүк –Түштүк альтернативдик унаа жолундагы коопсуздук маселелерин тиешелүү кызмат өкүлдөрү менен жеринде карады.
Нарын облустук админстрациянын маалыматына караганда, иш сапардын жүрүшүндө Жумгал, Дыйкан жана Байзак айылдары аркылуу өткөн жол тилкесине жөө жүргүнчүлөрдүн коопсуздугун камсыздоо максатында жасалма жол тосмолорун орнотуу боюнча тапшырма берилди.
Ошондой эле жолдун Сары-Булуң тилкесиндеги көзөмөл-өткөрүү посту каралып, аны коопсуз жерге көчүрүү жана айдоочулар менен жүргүнчүлөр үчүн ыңгайлуу шарттарды түзө турган ылайыктуу жерди аныктоо тапшырмасы коюлду.
Белгилей кетсек, Түндүк –Түштүк альтернативдик жолу жайкы мезгилде гана убактылуу пайдаланууга берилип, күн сайын саат 20:00дөн таңкы 06:00гө чейин көзөмөл посту иш алып барат.
