Талас облусунун 82 жылдыгы белгиленди
Министрлер Кабинетинин төрагасы Адылбек Касымалиев Талас облусунун түзүлгөндүгүнүн 82 жылдыгына арналган салтанаттуу иш-чараларга катышты. Аймактын тургундарына кайрылуусунда Министрлер Кабинетинин төрагасы облустун тарыхый маанисин белгилеп, Талас ар дайым ынтымактын, тынчтыктын жана жакшы коңшулуктун мекени болгонун, ар түрдүү элдердин жана маданияттардын өкүлдөрүнө урмат көрсөтүү салттары ушул жерде калыптанганын баса белгиледи. Бул тууралуу президенттик админстрациядан билдиришти.
“Кыргыз эли байыртадан бери эр жүрөк жана баатыр эл. Талас – Манастын, Чолпонбай Түлөбердиевдин жана Чыңгыз Айтматовдун жери. Бул – Кыргызстанды эрдиги, таланты жана эмгеги менен даңктаган көрүнүктүү инсандарды тарбиялаган ыйык жер”, - деп белгиледи ал жана облуска мындан ары да өнүгүү, бакубатчылык жана гүлдөп-өнүгүү каалады.
Министрлер Кабинетинин төрагасы акыркы жылдары президенттин колдоосу менен Талас облусунда социалдык, инфраструктуралык жана экономикалык чөйрөдө ири долбоорлор ишке ашырылып жатканын белгиледи.
Бир катар объектилер Кыргызстандын Эгемендүүлүгүнүн 35 жылдыгына карата быйылкы жылы пайдаланууга берилет. Талас районунда “Манас Ордо” тарыхый-маданий комплекси толук кайра курулууда. Айтматов районунда “Айтматов Ааламы” маданий-мемориалдык комплексин куруу боюнча курулуш иштери жүрүп жатат. Ошондой эле Суусамыр – Талас – Тараз эл аралык автомобиль жолун реконструкциялоонун стратегиялык мааниси жана курулган "Бала-Саруу" чакан ГЭСи өзгөчө белгиленди.
Мындан тышкары, Министрлер Кабинетинин төрагасы быйылкы жылдын 11-12-сентябрында Талас шаарында өтүүчү эгемендүүлүктүн 35 жылдыгына арналган майрамдык иш-чараларды уюштуруу жана өткөрүү боюнча жыйын өткөрдү.
