Данияр Амангелдиев: Өкмөт чара көрбөсө, күйүүчү майдын баасы 140 сомдон ашмак
Министрлер кабинетинин төрагасынын биринчи орун басары Данияр Амангелдиев дүйнөлүк рынокто күйүүчү майдын кымбатташы Кыргызстандагы баага да таасир эткенин билдирди. Бул тууралу ал "Биринчи радионун” эфиринде билдирди.
Амангелдиевдин айтымына караганда, акыркы эки айда бензиндин дүйнөлүк баасы дээрлик эки эсеге өсүп, бир тоннасы 860 доллардан 1700 долларга жеткен. Эгер өкмөт бааны турукташтыруу боюнча чараларды көрбөсө, өлкөдө бензиндин баасы литрине 140 сомдон ашмак.
Учурда өкмөт мунай сатуучулар менен биргеликте баанын кескин өсүшүнө жана күйүүчү май тартыштыгына жол бербөө үчүн баа айырмасын субсидиялап жатканын белгиледи. Бирок күйүүчү майдын кымбатташын бюджеттин эсебинен толугу менен жабуу мүмкүн эмес экени айтылды.
