Гепатитти дарылоого 492 млн сомдон ашык каражат бөлүнгөн
Кыргызстанда быйылкы жылдын алты айында 1 миллиондон ашуун адам гепатиттин вирустук В түрүнө каршы эмдөө алды. Алардын ичинен биринчи дозасы 446 319, экинчи дозасы 358 159, үчүнчү дозасы 250 534 адамга сайылган. Бул тууралуу Республикалык кан аркылуу жугуучу вирустук гепатиттерди жана адамдын иммундук жетишсиздик вирусун көзөмөлдөө борбору билдирди.
Маалыматка таянсак, В вирустук гепатити боюнча 6229 бейтап, В жана D вирустарынын ко-инфекциясы боюнча 3244 бейтап дарыланууда. Ал эми С вирустук гепатити боюнча 7541 бейтап дарыланып, алардын 6573 дарылоону ийгиликтүү аяктап, сакайган.
Ал эми 235 миңден ашуун адам гепатиттин В түрүнө, 234 миңден ашуун адам гепатиттин С түрүнө, 20 миңден ашуун адам D түрүнө текшерүүдөн өткөн.
Гепатитти алдын алуу жана дарылоого мамлекет 2026-жылга 492 млн 460 миң сом бөлгөн.
Ушу тапта өлкөдө гепатиттин оор түрлөрү менен каттоодо тургандардын саны 32 миңден ашуун.
