Сокулуктун Күнтуу айылына суу сактагыч курулат
Президент Садыр Жапаровдун жана Министрлер Кабинетинин төрагасынын орун басары Эрлист Акунбековдун тапшырмасына ылайык, Чүй облусунун Сокулук районундагы Күнтуу айыл аймагында суу сактагычты куруу маселеси боюнча жергиликтүү тургундар менен коомдук талкуу өткөрүлдү.
Айыл чарба министрлигинин маалыматына ылайык, иш-чарага Жогорку Кеңештин депутаты Эдита Тайгараева, Суу ресурстары кызматынын жетекчилиги, жергиликтүү өз алдынча башкаруу органдарынын өкүлдөрү, айыл активи жана тургундар катышты.
Жолугушуунун жүрүшүндөминистрдин орун басары Алмаз Жээналиев суу сактагычтын долбоору, анын аймак үчүн мааниси жана күтүлүп жаткан жыйынтыктары тууралуу маалымат берди.
Белгиленгендей, долбоор ишке ашырылгандан кийин 1 500 гектар сугат жер үзгүлтүксүз сугат суу менен камсыз болуп, айыл чарба өндүрүшүнүн көлөмүн көбөйтүүгө жана түшүмдүүлүктү жогорулатууга өбөлгө түзөт.
Учурда министр Эрлист Акунбековдун тапшырмасынын негизинде суу сактагычтын долбоорлоо иштерине 19,6 млн сом өлчөмүндө каражат бөлүнүп, “Кыргызсуудолбоор”ААК тарабынан долбоорлоо иштери башталды. Долбоор даяр болгондон кийин курулуш иштери жүргүзүлөт.
Жыйындын жыйынтыгында катышуучулар суу сактагычты куруунун зарылдыгын белгилешип, тиешелүү протокол кабыл алышты.
