Адылбек Касымалиев: Күйүүчү майдын баасы жогорулайт
Кыргызстанда күйүүчү майдын баасы акырындык менен жогорулай берет. Бул тууралуу Министрлер Кабинетинин төрагасы Адылбек Касымалиев билдирди.
Анын айтымына караганда, өлкө күйүүчү-майлоочу материалдардын 90%дан ашыгын импорттойт, ошондуктан ички рынок тышкы бааларга, геосаясий кырдаалга жана транспорттук чыгымдарга түздөн-түз көз каранды.
“Азырынча бааларды туруктуу кармап турабыз, бирок баары бир акырындык менен жогорулайт”, - деди Касымалиев.
Ал Орусиядан жеткирүү мурдагыга караганда татаалдашканын белгиледи. Учурда бийлик бир катар өлкөлөр менен сүйлөшүүлөрдү жүргүзүп, альтернативдүү каттамдарды издеп жатат.
Бүгүнкү күндө күйүүчү май Беларустан да келип жатат. Кытайдан алгачкы партия – беш цистерна – жеткирилди.
Мындан тышкары, Кыргызстан Өзбекстан менен сүйлөшүүлөрдү жүргүзүүдө. Өзбек тарап импорттолгон чийки мунайды өзүнүн заводдорунда кайра иштеткенден кийин айына болжол менен 20 000 тонна мунай продуктуларын жеткирүүгө даяр.
Түркиядан жана Европа өлкөлөрүнөн жеткирүү маселеси каралууда. Бирок мындай каттамдар Каспий деңизи аркылуу жана бир нече өлкөнүн аймагы аркылуу ташууну талап кылат, бул болсо күйүүчү майга кеткен чыгымды олуттуу жогорулатат.
Өкмөт башчы мамлекет дизелдик отунга, суюлтулган газга жана АИ-92 үлгүсүндөгү бензинге бааларды субсидиялайт. Мунун аркасында баалар Өзбекстан жана Тажикстанга караганда болжол менен 20-25 сомго арзан.
Бирок, чыгымдардын жалпы өсүшүн дайыма бюджеттин эсебинен жабуу мүмкүн эмес, анткени бул үчүн миллиарддаган сом талап кылынат.
