Кара-Сууда 60 млн сомго курулган бала бакча жакында ачылат

Курулуш, архитектура жана турак жай-коммуналдык чарба министрлигине караштуу Турак жай-жарандык курулуш департаменти тарабынан Ош облусунун Кара-Суу районунун Савай-Арык айылында 100 орундуу жаңы бала бакчанын курулушу аяктады.

Долбоор республикалык бюджеттин эсебинен каржыланып, анын жалпы наркы 60 миллион сомду түздү. Курулуш иштери 2025-жылдын март айында башталган.

Учурда объектте эмеректерди жайгаштыруу жана жууп-тазалоо иштери жүргүзүлүүдө.

Заманбап талаптарга ылайык курулган бала бакчада бөбөктөрдүн тарбияланып, билим алуусу үчүн бардык шарттар түзүлгөн. Имаратта уктоочу жана сабак өтүүчү бөлмөлөр, ашкана, азык-түлүк сактоочу кампа жана кабылдама жайгашкан. Объекттин жалпы аянты 988 чарчы метрди түзөт.

Ошондой эле бала бакчанын айланасы көрктөндүрүлүп, оюн аянтчасы курулуп, эс алуучу отургучтар орнотулган.

Жаңы бала бакчаны жаңы окуу жылынын башталышы менен пайдаланууга берүү пландалууда.