Тоолуу аймактарда нөшөрдөн улам 8-11-августта сел жүрүшү мүмкүн
Кыргызстанда 8-августтан 11-августка чейин нөшөрлүү жаан-чачын жаап, өлкөнүн тоолуу аймактарында сел жүрүшү мүмкүн. Бул тууралуу Транспорт жана коммуникациялар министрлигинин басма сөз кызматы билдирди.
Маалыматка ылайык, жолдордо коопсуздук эрежелерин сактоо, кырдаалга жараша кыймыл аракеттерди жөнгө салуу жана өзгөчө кырдаалдарга даяр болуу зарыл.
Ошондой эле айдоочуларга тоолуу аймактардагы жолдордо жүрүүдө өзгөчө сактык менен мамиле кылуу, жаан-чачын учурунда ылдамдыкты азайтуу жана кооптуу тилкелерден алыс болуу сунушталат.
Министрлик кырсыктарды алдын алуу жана жол коопсуздугун камсыздоо максатында тиешелүү иштер жүргүзүлүп жатканын белгилеп, аба ырайынын өзгөрүшүнө байланыштуу жарандарды жана айдоочуларды этият болууга чакырды.
