Санарип рубль жана тез төлөм - РФнын финансы рыногундагы өзгөрүүлөрдү тездетүүдө
Россиянын өкмөт башчысы Михаил Мишустин 23–26-сентябрь күндөрү өтүп жаткан XXIII Эл аралык банк форумунун катышуучуларына, уюштуруучуларына жана конокторуна кайрылып, каржы рыногундагы негизги өзгөрүүлөр тууралуу айтып өттү.
Мишустиндин белгилешинче, санариптик рублди жана тез төлөм системаларын киргизүү каржы кызматтарынын заманбап түзүмүн өзгөртүп, рыноктогу өзгөрүүлөрдүн негизги кыймылдаткычына айланууда.
“Жаңы инфраструктура өзгөрүүлөрдүн негизги драйвери болууда. Санарип рублди жана тез төлөм системаларын киргизүү каржы кызматтарынын заманбап көрүнүшүн өзгөртүүдө. Ал эми жасалма интеллект процесстерди автоматташтырууга жана кардарларга жекелештирилген сунуштарды берүүгө жардам берип жатат”, деп билдирди РФ өкмөт башчысы.
Мишустиндин айтымында, ошол эле учурда коопсуздук, киберкоргоо жана технологиялык эгемендүүлүк ата мекендик чечимдердин, системалардын жана маалыматтарды коргоо механизмдеринин жардамы менен камсыздалышы маанилүү.
“Күч-аракеттерди бириктирүү менен заманбап чакырыктарга жооп берип, өлкөнүн финансы-кредиттик системасын мындан ары өнүктүрүү жана бекемдөө үчүн зарыл болгон иштерди жүргүзүүгө болот”, — деди Мишустин.
XXIII Эл аралык банк форуму 23–26-сентябрь күндөрү Санкт-Петербургдагы Corinthia St Petersburg мейманканасында өтүп жатат. Форумга салттуу түрдө Россия Банкынын, аткаруу жана мыйзам чыгаруу бийликтеринин жогорку кызмат адамдары, ошондой эле каржы жана IT рынокторунун алдыңкы банктары жана компаниялары катышууда.
